Summerchummer oder Chummersummer?
Text: Ernst Hunziker
Das Lache het e Gschicht. Üsi Gschicht. Wil denn, mit däm leide Summer, üsi Liebi aagfange het. Denn, wo der Früehlig nach churzem Blüeie fasch nahtlos i Herbscht überggange isch:
Syt Tage isch es nass u grau. Rägne tuets zwar no grad nid, aber e suure Luft strycht um d Husegge. Näbelfätze hange über d Decher y. Es Wätter zum Verleide. Derby söttis jetze doch sunnig u warm sy. Der Summer steit vor der Tür un i möchti doch ds warme, herrleche Wätter chönne gniesse. Möchti i d Badi ga lige, d Sunnestrahle uf my Hut la würke, chli hinderelige u ds Nüttue pflege. Aber jetze isch wider alls grau in grau! I ha Fyrabe gmacht u hätti eigetlech Zyt, dusse, inere Gartewirtschaft, ufene gäbige Stuehl
z höckle. Zyt für bimene chalte, durschtlöschende Bier gmüetlech d Seel chli la z
bambele.
Aber nei! Für veruse z hocke u sechs inere Gartewirtschaft gmüetlech z mache, isch es z nass. Mittlerwyle rägnets nämlech wider.
Ja nu. Was wott me?
I setze mi drum im nächschte Beizli, wo mer übere Wäg louft, a nes gäbigs Tischli. Es isch ds erschte Mal, das i hie inne hocke. Obwohl i scho öppe dranne verby gloffe bi, isch mer das Lokal no gar nie ufgfalle. I luege mi chli um. Gmüetlech ygrichtet isch es. Rustikal, aber nid allzu alt. So, wien igs gärn ha. Es Beizli zum Verwyle u zum Gniesse. Erstuunt stellen i fescht, dass die hie sogar eigets Bier braue. Das isch zwar hüt nümme so usser-
gwöhnlech. Mittlerwyle schiesse Chlynbrauereie wie Pilze zum Bode us. Aber das isch ja o nid verwunderlech. Vor Jahre hei d Grossbrauereie die Chlyne ufgchouft. Mit em Resultat, dass vo denn a dene ihri Bier fasch alli glych gschmöckt hei. Einheitsbier. Das hei findegi Chöpf nid wölle akzeptiere u hei aagfange sälber Bier braue. Drum gits hüt statt Einheitsbier e grossi Vielfalt a underschidlechschtem Gärschtesaft. E Trend, wo mir natürlech passt. I ha gärn Abwächslig. Grad o bim Bier.
Weisch no, fragt si, letscht Summer? Summer? Hei mir letschts Jahr e Summer gha? I weis vo nüt.
Syt Jahre braui me i däm Beizli ufe Summer häre zwöi Summerbier, erklärt das Huuri. Beidi syge geng mit summerleche Näme aabotte worde. Badibier, Sunnebröi, Feriebier, Summerbrüni, Wällebrächer, u no es paar anderi Näme zellt si uf. Wil aber ihrer Gescht die letschte drei Summer wäder sunnig no badig empfunde heige, syge d Lüt meh missmuetig als summerfröhlech i der Beiz inne ghocket. U älwä vor luter Läckmer sygi ds Personal geng wäge dene summerleche Biernäme aazündet worde. Näme, wo so gar nid zum Summer heige wölle passe. Wil ihre Chef gnue heig gha vo dene leide Summer u dermit o gnue vo de Sprüch vo de übel gluunete Gescht, heig är uf die Saison häre syner Biertitle dämentsprächend aapasst: Summerchummer u Chummersummer heissi die hüür. De chönni jede sälber useläse, öb er wägem Summer Chummer, oder öb er wägem Chummer ke Summer heig. Nach dere Erklärig stellt si wider d Frag nach myre Bstellig. Sichtbar glängwylet. I ha mi du nid no gwagt, der gschmacklech Underschied z erfrage, u ha churzentschlosse es Chummersummer-Bier bstellt. Eh ja. Der Chummersummer steit vor der Tür. Ömel wen er so wyter macht wie die letschte Tage.
D Bedienig isch du wäggschlarpet un i ha mi wyter im Beizli ume gluegt. Es isch würklech mit vil Liebi zwäggmacht. Hie häre chiemti älwä no meh. Aber d Bedienig müessti de scho no chli uftoue. Süsch chönnti de kes Capuccino bstelle. Da suureti nämlech sogar d Milch…
Ds Bier, wo mer die Servierere bringt, gseht us wie nes anders Bier o. U wies bim Bier
so isch: Der erscht Schluck schmöckt am beschte, löscht der erscht Durscht – u git grad der nächscht. Drum isch mys Glas scho zimlech gly gläärt. Es isch es feinschmöckigs Bier, dünkt mi. Würzig, erfrüschend u glych nid z bitter. Würklech es richtigs Summerbier. Da chönnt me derby sogar der Chummersummer vergässe.
Won ig mir ds Zweite bstelle, natürlech es Summerchummer-Bier, überlegen i, was für mii eigetlech e Summer usmacht. Oder äbe, wenn dass i vom Sunnesummer würd ds Gfüehl ha, är göng langsam i richtig Chummersummer. Summer bedütet für mii Sunne, natürlech. De Wermi. Nid Hitz. Längi Tage, wo me cha dusse verbringe. Gmüetlech zämehocke. Entspanne. Der Seel chli Usgang chönne z gä u se i d Wält vo der Phantasie la z gah. Das isch für mii Summer.
Wo d Frou zuecheschlarpet u mer ds zweite Bier bringt, hocket si e Momänt zue mer. I weis nid, was das söll. Ihri Gsellschaft bruchti eigetlech grad nid. D Usstrahlig, wo si het, würd nämlech länge, für nes Ross zum Gränne z bringe.
Es loufi grad nid vil hinech, seit si. Die Ussag irritiert. I ha zwar scho gseh, das nume no zwe Tische bsetzt sy. Aber ihre Ton? Dä klingt anders als vori. Ersch won ig se aaluege, gsehn i, dass di Frou ja zwöi ganz verschideni Gsichter het. Ds Serviergsicht, wo eim tschuderet, wil me nid gnau weis, öbs Schwärmuet oder nume Glychgültigkeit usdrückt. U jetze das hie, wo… Ja, was drückts us? Fröhlechkeit? Härzlechkeit? Gwunder? Spitzbüebigkeit? Älwä alls mitenand. Es isch eifach es härzigs Sunnegsicht, wo mir da entgägestrahlet. Es Gsicht, wo mir guet tuet.
Der Seel chli Usgang chönne z gä u se i d Wält vo der Phantasie la z gah. Das isch für mii Summer.
I säge ihre du, dass es mi schad dünkt, we me e schlächte Summer mit negative Biernäme no tuet z Bode reise. Un i cha mir o nid vorstelle, das e Beizer mit somene Konzept lang cha überläbe.
Da belehrt si mi du aber. Syt dass bekannt sygi, dass i däm Restaurant zwöi settegi Bier usgschänkt wärdi u dass ds Personal o dämentsprächend ufträtti, sygi der Umsatz massiv gstige. D Lüt chömi cho luege. Wils nöi syg. Unbekannt u quer. Ds Bier interessieri nid so. Der Gäg aber scho. U äbe: ds Personal. Da chöm der Eint oder Ander, wo us irgend emene Grund schlächt druffe syg, öpper cho luege, wos o so schlächt heig. Das tröschti, heig si vo verschidene Lüt ghört. Aber äbe. Zum Wärche sygs gneitig. So geng abglösche dür d Beiz loufe, hänki aa. Drum fröji si sech albe, we öpper häre hocki, wo sech vo ihrem Bier, vo ihrer Mouggere u vo ihrer ufgsetzte schlächte Luune nid löij la aastecke. Drum heig si Fröid, chli zu mir
z hocke. I syg ihre sympatisch, meint si no
u lachet mi mit ihrem härzige Gsicht aa.
Das stellt mi natürlech uf un i fröie mi, so ne ufgstellti Frou gägenüber z ha. Leider duuret
üses Gspräch nid lang. Si muess wider ga bediene. Mit schwäre Schritt schleipft si sech übere zum Tisch mit de nöie Gescht. Was si für nes Gsicht macht, gsehn i nid. I wotts o nid gseh. Lache mues i aber glych, wen i dra dänke, dass das alls nume gspilt isch. Wo si wider zu mym Tisch chunnt, bstellen ig bi ihre no es dritts Bier. Si fragt mi nid, was für eis. Si seit nume, si löi mer eis use un i chönni der Name sälber kreiere. Du chunnt si mit ihrem Chopf ganz nach zu mym u drückt mer es Müntschi uf d Backe. Lachet, setzt d Mouggere uf u dräit sech vo mir wäg.
Dä spontan Muntsch mues i zersch verdoue. I luege ihre chli bim Bediene zue. Si isch scho ne härzige Chäfer. U cha hervorragend schouspilere. I mues lache, wen i gseh, wie d Gescht hinder ihrem Rügge munkle. U lache mues i o, wil i gseh, wie wenig dass es brucht, dass me sech es Urteil bildet. Es brucht e negativ belaschtete Biername, e theatralischi Bedienere u scho het me e Beiz, wo anders isch als alli andere.
Wo si ds dritte Bier vor mi häre stellt, fragt si lächelnd, öb i e Name für das namelose Bier gfunde heig? I mues nid lang studiere u säge ihre, das Getränk heissi ab hüt Müntschi-
Bier.
Si zeigt ihres schönschte Lächle. U Müntschi überchumen ig o. Aber nid nume eis. U de o nid nume uf d Backe.
