Müetere hi nach em Wuchebett jederzyt Bsuechsrächt gha. D Ufgab vo üs Pflegende isch gsy, di Ching sorgfäutig z pflege, z ässe gä, se z beobachte, se i ihrer ganze Entwicklig z fördere u ne viiu Liebi z gspüüre z gä. Mi het mit ne gsunge, gspilt, turnet, brichtet, het ne Zyt gschänkt u isch ne Mueterersatz gsy, sowit das überhoupt isch müglech gsy. U mängisch het i der Zyt e Mueter, wo ihres Ching zersch abglehnt het, no ne Fade zuen ihm gfunge u het mit ihm Glücksmomänte chönne erläbe. Für körperlech oder psychisch behindereti Ching isch es schwär oder nid müglech gsy, e Pflege- oder Adoptivplatz z finge. Di Ermschte vo den Arme hi, nach vier Jahr im Chinderheim, ihres räschtleche Läbe i me Asyl Gottesgnad müesse frischte. Waiseching, Ching us chinderryche, arme Familie oder Ching, wo niene hi söuue sy, wo eifach z viiu sy gsy ir Gseuschaft, sy im e Chinderheim blibe, bis si vo der Fürsorgebehörde aus Verdingching i ne Familie sy platziert worde. Das hiisst, si hi i der frömde Familie ihre Ungerhaut meh oder minger müesse verdiene, si sy bruucht u missbruucht worde u hi viiufach scho aus Sächsjährigi müesse wärche wi Chnächte u Mägd. D Kontroue im Fürsorge-, Pflege- u Verdingchin- derwäse isch schlächt gsy. Behörde u Ämter sy überforderet gsy u derdür unmönschlech, ungrächt u gfüeulos vorgange mit dene Verdingching u ihrne Eutere. Me het se aus e mingerwärtigi Sorte Mönsche aagluegt u o derna behandlet. Um ihres körperleche Wou u ihres Seeleläbe het me sech nid gwüsst z kümmere. Me het no nüt vo Chinderpsychologie gwüsst.

Ds Pflegepärsonau u d Schüelerinne sy im Hohmad intern gwohnt. Di Verantwortleche sy so jederzyt abrüefbar gsy, o Znacht. Mir sy dür das Zämeläbe zu re Aarbiits-, Läbes- u Husgmeinschaft worde u hi gluegt, das mer guet sy uscho zäme. Mir hi ir Mittagsstung bim Gaffi brichtet, Fröide u Sorge beredt u Problem gluegt z löse. So hi mer o mit mängem iigete Chnorz chönne zrächt cho. Mir hi zäme Feschtli gfyret u Usflüg gmacht.

Iinisch a me freie Tag sy mer üsere viere am Morge am föifi gstartet mit eme Taxi uf Oberstocke. Dert het üsi Wanderig uf ds Stockhorn aagfange. Ueche über Wiiden, der sänk- rächte Nordwang vom Stockhorn zue. Die hi mer umrundet u sy über Feusblöck gchlätteret. Es isch e strängi u fasch hausbrächerischi Tour, aber e wunderschöne Ufstiig gsy. Ke Mönsch isch is begägnet, nume es Gemschi isch dervoggumpet u ne einsami Dohle isch us eme Feusspaut ufgfloge.

Churz unger em Gipfu sy mer i der Sennhütte bim Senn zu Gaffi, Chäs u Brot ygchert. Mir hi nid schlächt gstuunet, wo dä gross, blond Chüeijer nume broche dütsch het gredt un is anstatt Stockhornaupchäs holländische Edamer uftischet het. Aber scharwänzle mit junge Froue, das het er trotz der Sprachbarriere chönne. Er het is unbedingt ds Masselager wöue ziige. Bette tüei me mit der Höigable, het er gsiit. Si isch parat gstange im Egge u ds Höi uf em Lager isch scho früsch zettet gsy. Zum Zuedecke isch für jedes e Militärdechi mit em Schwyzerchrüz druff a der Fuessete gläge. Mir söue doch übernachte, är chöm de scho zuen is cho lige, für is z beschütze vor em Stockhorngeischt. Mir hi glachet, abgwunke u grosszügig uf ene betröiti Übernachtig verzichtet. Sy derfür ueche zum Gipfuchrüz di wunderschöni Ussicht ga gniesse u derna fröhlech u singend vor em Ynachte abgstige u gäg em Hohmad zue.