Text: Ernst Hunziker | Bild: Martin Mostosi
Vo dir weis i, dass du gärn underwägs bisch. Dass du scho verschidenschti Länder b’bsuecht hesch, u grad vor Churzem vomene lengere Ufenthalt z’Ouschtralie bisch zruggcho. Aber o, dass du scho nächschtens wider zunere lengere Reis wosch starte. Das Mal aber mit Rucksack u gäbige Schue. Reise!
Reise u Adväntszyt
Ja, si syge denn o uf Reise ggange, die zwöi. Der Josef u d’María. Vo Nazareth uf Bethlehem syge si gloffe. So kenne mers vo der Wiehnachtsgschicht här. U de heige si no e Esel by sech gha, seit me. Vor allem für d’Maria, wo ja älwä nümme so wyt het möge loufe. Wyt isch es nämlech gsy für die zwöi. Guet hundertfüfzg Kilometer läng isch dä Wäg. We me dänkt, dass e Esel öppe zwänzg Kilometer pro Tag louft, de wärde si für die Strecki e gueti Wuche b’bruucht ha. U d’Maria hochschwanger.
Reise isch zu dere Zyt natürlech ganz öppis anders gsy als hüt. E Reis underno het me denn nume usere Notlag use. Also we me am Standort nümme z’ässe het gha oder we eim d’Natur alls verwüeschtet het. Das Reise isch drum ehnder es Flüchte gsy. U ja, me het o müesse reise, wes d’Obrigkeit befohle het. So wie denn, vor guet zwöituusig Jahr, wo der Keiser Augustus e Volkszählig aagordnet het. Für das hei die zwöi äbe uf Bethlehem müesse. E länge, e beschwärleche Wäg hei si müesse hinder sech bringe. E schwiregi Reis, wo de, wäge der müehsame Suechi nach emene Gliger, ersch no ke guete Abschluss het gha.
Chöi mir nes äch vorstelle, wie die zwöi sech denn gfüehlt hei? I dänke nid. We mir uf Reise göh, de hei mir ja meischtens scho ne Underkunft reserviert. Oder hei de ömel d’Müglechkeit, i nes anders Dorf oder i ne anderi Stadt uszwyche, wes ke Platz meh sötti ha. So ne Müglechkeit hei si denn nid gha, die zwöi. Si hei i ne Stall müesse. Der Josef u sy hochschwangeri Maria.
I hoffe, dass du uf all dyne kommende Reise geng wider irgendwo e schöne u gäbige Platz zum Obernachte findsch u dass du geng wider gueti, interessanti u fridlechi Lüt um di um hesch, wo dir nume Guets wel. Gniess es!
Dies ist eine von 24 Geschichten aus dem neuen Buch Adväntsgschichte von Ernst Hunziker und Martin Mostosi.
Buchtipp
Adväntsgschichte
Ernst Hunziker
Martin Mostosi
56 Seiten, 12,5 x 19,5cm
gebunden, Hardcover
ISBN 978-3-03818-644-1
CHF 29.–
Erhältlich auf www.weberverlag.ch oder im Buchhandel
Martin Mostosi
Der Martin Mostosi, 1951 z’Unterseen gebore, het Maler u Schriftengrafiker glehrt. Hüt isch er freischaffende Künschtler. Syner Kunschtmalereie u Objekt us verschidene Materialie zeichne ihn äbeso us wie sy Mitgliedschaft i der Gilde der Bergmaler. Är isch regelmässig a Usschtellige verträtte. Im Weber Verlag sy d’Bildbänd «Entlang der Aare» und «Berghörner in den Berner Alpen» erschine. Är isch lang als Bruefsmusiker underwägs gsy u musiget hüt no. Mängisch zäme mit sym Brueder.
www.art-mostosi.ch
Ernst Hunziker
Der Ernst (Aschi) Hunziker, 1955 z’Boltige gebore, het Spängler-Installateur glehrt. Gwärchet het er ufem Flugplatz Interlake als Flugzüügspängler u später bi der Gmeind Interlake als Aalage- u Materialwart (Zivilschutz/Füürwehr). Ab 1999 isch er Kommandant vo de Zivilschutzorganisatione Bödeli u Jungfrou gsy. Mittlerwyle isch er pensioniert. Syt Jahre schrybt er Churzgschichte, Romän, Krimis, aber o Volkstheater. Als Usglych zum Schrybe spilt er Schwyzerörgeli.
www.ernsthunziker.ch
