Text: Ueli Seiler-Hugova | Bilder: zvg
Aus Jugendliche han ig im Rosehofpark a Zwärgesuhängscht gha. Är isch bissig gsi u fasch niemer het ne chönne bsorge. Ou mi het är bbisse, wen ig ihm dr Rügge zuekehrt ha. I ha ne i syre Gstaut bewunderet: I syner grazile Art, mit syne dünne Scheichli, mit syne vertröimte Ouge, syne ständig fäckelnde Ohre, mit sym schwarze Chrüz am Rügge, mit ständig wädelndem Schwanz – är isch mir vertrout gsi. Am ydrücklichschte isch sys Brüele gsi: Mi het ds Gfüeu gha, dr ganz Härzschmärz brächi uuf.
I ha nes Zwöiräderchäreli gha. Drvor han ig ne ygspanne. I bi öppe i Waud gfahre oder a Bahnhof ä Bsuech go abhole. Normalerwys isch är nume träppelet. Das isch de z langsam ggange. Mir aus Choleriker viu z langsam. Do han ig ihn ä chli gguslet. De isch äs im Galopp ggange u de scho wider fasch z schnäu.
I bi ja z Bärn i d Schueu ggange. Am Morge früe han ig ne gfueteret u bi de ersch im spätere Namittag heicho. U de isch öppis Gheimnisvous passiert, was ig mir no hütt nid cha erkläre: Wen ig ds Dorf düruuf bi cho, no bevor ig um e Egge vo de letschte Hüser bi gsi, het dr Esu, wo Bouggi het gheisse, ds lutermordio afe möögge, aus hätt är mi um e Egge gseh cho. Schnäu bin ig zu ihm ggange. Sys Möögge het immer so nach Längizyti tönt u i ha fasch äs schlächts Gwüsse gha. No wen i scho bi ihm bi gsi, het är ggreinet u gmulet. Isch aber de zfride gsi.
So han ig gmerkt, wie näs Tier sich mit eim cha verbinge. U d Verantwortig isch ihm gägenüber gstige. I bi natürlich stouz gsi, dass ig aus Einzige ihm ha chönne bcho. Mi het är reschpäktiert. Dass är so Fröid het gha, wen ig zu ihm ggange bi, ihn gstriglet ha, mi mit ihm beschäftiget ha, het mi beydruckt. Für öpper wichtig sy, isch gloub i däm Auter ä essenzieui Erfahrig.
Mir hei später no meh Esle gha. Doch einigi hei sich mit Eibezweige im Park vergiftet. Das isch schrecklich gsi. Mir hei gwüsst, dass Eibe giftig sy, u hei versuecht, d Esle drvor z bewahre. Doch die sy öppe usbbroche u hei usgrächnet vo dene Eibezweige müesse frässe. Das isch tödlech gsi.
Doch my Esu han i no lang bsorget. U dass är mi um e Egge ume gseh het, isch mer äs Rätsu bblibe.
Ueli Seiler-Hugova
Ueli Seiler-Hugova, 1942 z Chlydietu gebore. Ufgwachse unger äm Sigriswilergrat. Läbt bis hütt im Schlössli Ins – aus Ching, de aus Lehrer, Heimleiter, Presidänt vo dr Stiftig Seiler, Mitglied vom Europäische Forum für Freiheit i dr Erziehig (EFFE), Gaschtprofässer z Riga, Mentor u Vortragende i de tschechische Waldorfschuele. Verfasser vo Sachbüecher über Farbe, Stärne, Parzival, Peschtalozzi u Steiner. Vatter vo sibe Ching us zwo Familie. Verhüratet mit dr Kamila.
