U dä Bär wohnt am Wyderain u het gärn Wydebüüssi. Sys Büüssi aber, e wyss-schwarzi Chatz, het – statt Wydebüüssi – lieber e Spatz. U dä Bär wohnt ar Schläflistrass u zeut Schäfli bis är schlaaft. U schlaaft är de, sy d Schäfli wägg, u ds Schaffäu git ihm warm im Bett. U dä Bär wohnt am Zäutwäg u fahrt jede Summer mit sym Zäut wägg. Schlawyneret vo Strand zu Strand, u chunnt är hei, isch aus vou Sand! U dä, Bär wohnt am Burdiwäg u treit sy Burdi Tag für Tag. Di Burdi, seit är, tüei ihn ärde, drum wöu är di Burdi nid loswärde. U dä Bär wohnt am «Chemin de loup» u ... «c’est fou!» isch e «filou, des genoux au cou.» U dä Bär wohnt ar Wohlestrass u wou ischs ihm daheime. A der Wohlestrass no wöhler, ischs ihm nach paarne Aukohöler! U dä Bär wärchet bir Bärner-Press u het mängisch mega Stress. De tuet är eifach e Gschicht erfinge, u de Lüt e Bär ufbinge.

U dä Bär wärchet aus Zahntechniker u künschtlet us Kunschtstoff Stalagmite u Stalaktite für Gebiss. Praktisch u schön – aber künschtleche Bschiss. U dä Bär wärchet im Uhregschäft u verchouft Ührli ohni Zahle u Zeiger. Zyt syg sowiso relativ u nid ächt, u wär zeigerlos läbi – seit är – läbi freier. U dä Bär wärchet imene Reisebüro u het di ganzi Wäut scho gseh. Im Katalog. Nid analog! U dä Bär wärchet im Tierspitau. U zu de Chatze seit är: «Miau». U zu de Hüng: «Wou-wou». U zu syr Frou: «Tschou». U dä Bär wärchet ir Forschig für Wind u läbt im Windschatte vor Zyt. Bi Düürzug tuet är Türe zue, u het sy Rue. U dä Bär wärchet aus Spitzechoch, u d Gescht rüeme ds Ässe hysterisch. Ihm isch das glych we öpper spinnt, solang Kasse stimmt. U dä Bär wärchet inere Schrynerei u macht schiggi Tischli mit drüne Bei. Mit vierne würde si besser stah. Itz stöh si haut nume so-so-la-la. U dä Bär wärchet aus Drääjörgeler u überschwemmt d Stadt mit Töön. Mängisch treit se der Bysluft furt, u mängisch verchuttet se der Föhn.

U dä Bär wärchet inere Bar u über das, won är ghört, chönnt är Büecher schrybe. D Lüt wurde säge är tüei übertrybe. Drum laht ärs blybe. U dä Bär wärchet bir Gmües AG u würd sich gärn aus Chef dert gseh. Är däicht: «Es gieng mer ring!» U het doch nüüt aus Zuckerärbs im Gring. U dä Bär wärchet aus Liftboy. U stygt öpper y, de seit är: «Hoi!» Fragt: «Wele Stock?» U drückt uf ds Gratwou so ne Chnopf. U dä Bär wärchet ir Stadtgärtnerei u züchtet «nöi» Rose für Lüt wo scho aus hei. Chlyni – u de no vo de grosse. U dä Bär wärchet aus Zuckerbeck u isch e Süesse u ne Verschläckte. U jedi Nacht sy Marzipan u Zuckerwatte rosaroti Troum-Zuetate. U dä Bär wärchet aus Erfinder u erfingt Züüg wos no nid git: Es Trottinet wo flügt, u Händsche mit sächs Finger.

U dä Bär wärchet bim Sockemax u kreiert settig mit Ringli u Blüemli. Doch d Lüt hei lieber üni. Drum verchouft är d Socke schwarz! U dä Bär wärchet aus Strassewüscher, u aus Abfau im Güder landet die Zyt wo Mönsche bim Stresse u Jufle verliere. Säget, syt Dihr nid o meischtens pressiert? U dä Bär wärchet bir Firma «Goume-Luscht» u erfingt e vegani Puurewurscht. Het tierisch Schwein! O Fleischmoudine finge das fleischlose Fleisch fein. U dä Bär wärchet aus Insekteforscher u kennt aus mit drüüne Beipaar von inne u usse. Vo de Chäfer über Beiji bis zu de Zägge. Sy wahri Liebi aber ghört de Schnägge. U dä Bär wärchet imene Versandhuus u nimmt bi de Päckli der Sand druus. Für e Versand isch das «picobello». Spart Porto. U dä Bär wärchet aus Samichlous u nume im Dezämber. Süsch het är uf der Wienachtsinsu der Plousch vo Jänner bis Novämber. U dä Bär wärchet inere Däichfabrigg u däicht Nöis, isch zu auem bereit. Weis aber ersch was är däicht, wen är ghört was är seit. U dä Bär wärchet aus Medium u seit: «I bi doch nid dumm! I säge de Lüt was si wei ghöre. Tue doch nid fautschi Illusione zerstöre.»