Da bin i der lescht Herbscht wuehi under der Ougschtmatten, bin Eduls Stein us der Stotzigen Siiten i ds Wägli anha choon. Eduls Stein u d Ougschtmatta siin i Sefenen ob der Poganggenalp underem Schilthoren. No uf der Ougschtmatten huusen Murbendi u dden nid gringu, si hein natiirli von dert us en häbendi Ussicht uf d Sefena u bis uf Busen uber. We d von der Rotstockhitten us guggischt, sii lingger Hand von der Ougschtmatten d Schafspring, dert hed s nid nummen scharpf Gemschbeck, o Puschelli Edulwiiss in denen Grinden. Item, s ischt Jagdziit gsiin im September. Due ischt äben es breesi under mier eso en ultimativa Moränetrapplig deswueha chon.
I han natiirli es Gwehr am Puggel tragen, das isch geng en Aziehigspunkt fir settegi Liit. Är ischt zirka 50 Meter under mer deswueha choon, due rieft er scho vo wiitem: «Heit er s uf d Murmeli abgseh?». I ha gseid, nei. Due rieft er no eis: «I däm Fau weit er es Gemschi schiesse». I han mid ja gantworted.
I bin nid där Typ, wa settigen gäären Uskunft gid, drum han i sofort die Lengen firha gnuun u bi obsi gliffen. Disa uuf un naahi, är hed gwiss es bitzli chennen ufholen, aber no glii hed er es rots Chepfli uberchoon. Da hei mmu due d Lekistäcken, Goretexhosi u Koramintabletten nid viil bschossen, und en Uberholspur, wan er mid Liechthupnen un Hornen hätt chennen uberholen, het s o keini gchäben. Wan i due scho fiin e chlii han Abstand gchäben un heej ob der Ougschtmatten gäg ds grossa Gstein han desinhi glaan, hed är, der Moränetrapplig, en bitz verahi tampfed, das s mu, wen er wän es Outo gsiin, hätt der Chieller verjagt. Är hed due uf e Pannestreifen miessen u Pousa machen. I han es Schnaps us der Wentelen gnuun u han wiiter gjagt.
Hie mues i no eppis sägen. Jägersliit sii rächti Liit, si machen niid Verbottes und hei d Stiiren zahlt, susch terfte s nid jagen. We mmu nämlich griesst u sech vorstelld u dernah aschtändig frägt, uberchund mu o en aschtändigi Antwort zrugg. U meischtens ischt en Gemschjäger o niin Jahr i d Schuel, hed e Bruef glehrd u d Jägerpriefig gmacht. U dden bruuchi s den no fiin e chlein e Gschiida, das er wiss, das er e Dumma siig.
