Und de bin i uf em Eschtrig gstange vor myne füfzäh Bananeschachtle, em Archiv vo mym ganze Läbe. Si sy mit ere Stoubschicht überzoge gsi; es Zeiche, dass me se scho lang nümme ufto het. I de einte han i Ordner mit Ungerlage us mym Bruefsläbe gfunge. Vo inträssante Kurse und Seminar, won i teilgno ha. E Huuffe Wüsse, wo eim het sölle hälfe, erfolgrych z gschäfte. Won i die Ungerlage no einisch dürebletteret ha, isch mer ufgfalle, dass d Schueligsspezialischte über d Johr gäng wider nöji Konzept für tüürs Gält aabotte hei, wo sech de aber schlussäntlech bim Verglyche nid gross vonenang ungerschide hei. D Schlüssle zum Erfolg sy bloss e chlei angers verpackt gsi, sozsäge unger em Motto: «Alte Wy i nöie Schlüüch!» I ha mi gfrogt, ob ächt eini vo myne Töchtere die einte oder angere Schueligsungerlage chönnti bruuche. Druuf han i mir aber e Ruck gä: «Für so öppis wird sech allwäg nach zwänzg oder dryssg Johr chuum meh öpper inträssiere. Derzue isch jo vermuetlech e grosse Teil dervo hoffnigslos veraltet!»

I ha ei Ordner nach em angere gläärt und d Ghüderseck mit Papier gfueteret. Zögeret han i, wo mer Gratulationsschrybe vo Beförderige und Lohnuswyse i d Finger cho sy. Fasch han i Beduure mit mir übercho, won i gseh ha, wie viil oder äbe wie weeni i vor dryssg Johr verdienet ha. Meh Fröid hei mer d Zahle vo de Stüürrächnige gmacht. Die sy drum denn ou viil bescheidener gsi als hütt. So het halt alls zwo Syte! Und beide sy jetz gmeinsam im Ghüdersack glandet. 

Meh Müei zum Logo het mer der Inhalt vo angerne Bananeschachtle gmacht. Es sy Briefe vo Familiemitglieder und Verwandte gsi. Die meischte dervo, drunger ou myni Eltere, sy scho sit langem gstorbe und i ha se müesse loslo. Söll i mi jetz ou vo de schriftleche Erinnerige trenne? 

Die erschte Zeichnige vo üsne Ching sy fürecho. E Teil dervo isch eigetlech meh es Kribel gsi. Aber mit viil Liebi gmacht. Und uf jedem Blatt isch mit chrumme Buechstabe es abgschribnigs «Mami» oder «Papi» gstange. Jede Vatter wär doch e Verräter, jo Verbrächer, wenn är so öppis würd furtgheie!

D Ghüderseck hei gäng weniger Fueter übercho. I han e wyteri Bananeschachtle ufto. Aasichtscharte us de Ferie, Chärtli vo üser Verlobig und vor Hochzyt sy mer i d Häng cho. Sogar no d Vorschleg vom Gaschthof für ds Hochzytsässe han i gfunge. Und näbe vilem ­angere ou d Programm vom Stadttheater, wo mer syner- zyt es Abonnemänt hei gha. Zwar nume für zwee günschtigi Plätz zoberscht obe. Aber die Programm hei mi a schöni Zyte mit de Volksschouspiler Jenny Rausnitz und Edwin Fabian erinneret. I ha d Bananeschachtle wider zuegmacht. Der Inhalt isch nid wäsentlech weniger worde. Messi hin oder här – i ha's no nid übers Härz brocht, mi vo dene Zytzüge vo früecher z trenne! Bin i do jetz grad draa gsi, mys Läbe oder e Teil dervo wägzrationalisiere, z lösche? Löschen i dermit nid ou e Teil vo mir?

So isch es vo Schachtle zu Schachtle wytergange. Bi alte Rächnige han i gseh, was für ne Prysentwicklig mir i de letschte dryssg Johr hei gha. Zytigsusschnitte us de guldige Erfolgsjohr vo der Maite Nadig, em Bärnhard Russi, em Roland Collombin, der Vreni Schneider, der Erika Hess und em Pirmin Zurbriggen hei mi lo i Sporterinnerige schwelge. Furt dermit – i Ghüdersack! I ha Ungerlage us myre Zyt als Presidänt vom Tanzmusikerverein as Tagesliecht brocht. 

Orcheschterverzeichnis, Vereinsnachrichte, Brichte vo Aaläss und Generalversammlige. Mänge bekannte Name vo ehemalige Musigkollege isch do uftouchet. Söll i all das is Archiv vom Verein gä? Die hei das doch scho sälber gsammlet. Und de weis me hütt jo ou nid, wie lang dass es dä Verein no git. Tanzmusig wie i de früechere Johr wird jo hütt chuum meh gmacht. Und d Mitglider im Verein näh jedes Johr ab. I tue der Dechel wider uf d Schachtle. 

nere wytere Bananeschachtle läbt my Zyt als Moderator für Musigsändige bi de Regio- nalradio vo Biel und Solothurn, «Canal 3» und «32 Goldies», wider uuf. Ordner mit Moderatione, Tegschte vo Gspräch mit Studiogescht, wie em Pepe Lienhard, em Roland Kaiser, em Sepp Silberbärger vom Alpe­land Quintett, em Markus Wohlfahrt vo de Klostertaler oder em Norbert Rier vo de Kastelruther Spatze. Erinnerigscharte vor Marie-Louise Werth oder der Monique. Fasch tuusig Sändige hei mir dennzmol gmacht. Und derby mängi schöni Begägnig mit inträssante und bekannte Lüt gha, wo mer ohni ds Radio nie hätte lehre kenne. D Sändejournal vo de gspilte Musigtitle han i schön i Ordner klassiert gha. Hei ächt myni Kollege das ou no ufbewahrt? Was söll i mache? Z viil mitenang sött me jo der Ghüderabfuer ou nid härestelle… I ha lengschtens es Taburettli uf e Eschtrig gno. Bi all dene Erinnerige, wo do zum Vorschyn sy cho, het sech halt ds Ufruume öppis i d Lengi zoge. 

Am Schluss han i stolz zwee schwär Ghüderseck vom Eschtrig achetreit und vors Huus gstellt. Drei lääri Bananeschachtle und e Reihe lääri Ordner sy näbem Chemi gstange. Und die übrige zwölf Bananeschachtle lagere, ohni Stoub, schön näbenang büschelet unger der Dachschregi vom Eschtrig.

Wo my Frou vo ihrem Bsuech bir Mueter isch heicho, han i ihre stolz brichtet, wien i uf em Eschtrig bim Ufruume gwüetet ha. Si het de ou gfunge, dass i's verdienet heig, mir am Oobe es Champions-League-Spiil vom FC Barcelona aazluege. Won i de bim ne Bierli vor em Bildschirm ha dörfe gniesse, wie der Spiler vo Barcelona mit em Zähni uf em Rügge im Zigzag dür die gägnerischi Abwehr zirklet isch und es Troumgool gschosse het, han i ganz stolz still für mi dänkt: Was doch so ne chlyne Messi alls zwägbringt!