Text: Christian Bärtschi | Fotos: zvg

Nan ere schwere Buuchoperation im Lindehofspital z Bääre hii mig d Tökter nug fur dry Wuchi zur Erholig uf Heiligeschwendi gschickt. Mi siit däm «Rehabilitation» – churz: «Reha». Ig bi grad orlig ggringa äs par Taag vur Wynachte da obna in däre verschnyte Landschaft aachoe. Zum Glück han ig in iima van däne Gebäude äs Zimmer fur miig ghabe – äso het mig niemer gstöert, un ig bin og niemerem zur Lascht gfale. D Taga sy grad toll usgfüllt gsy. Am Aafang bin ig im Rollstuel umhagchärelet worde, inere nääschte Phase han ig due zwee Stäcken uberchoe. Speeter han ig og dii chöne zrugggää. Van Aafang aa bischt amene strenge Therapie-Aagebott underworffe gsy: Atemüebigi, Stägeluuffe, Felofahre… Aber äs isch guet druf ggugget worde, dass dig nät hescht müessen ubertue. Zwüschenynhi, wet äs bitzi hescht chöne lüwe, sy gyng oppa Pflegefachfrouwi choe – Schwyzerine u anderi, wan dig gwäsche u frisch verbunde hii. D Uslenderine sy vur alem Tütschi, Poline u Frouwi us em Baltikum gsy, aber äs het og ä jungi Muslima derby ghabe. Allerdings het si og bim Pflege der Schlyer nät abzoge. Mi het igetlig nie rächt gwüsst, wie si würklig usgseht!

Iinischt an iim Taag ischt og ä jungi Frou i mys Zimmer choe. Si chömi var Diabetes-Beraatig, het si gwüsst z säge. Wyl ig gyng oppa äs bitzi ä höeja Bluetzuckerwärt ghabe ha, aber mit Tablette guet gfahre bi, het mig dä Bsuech nät erstunt. Aber wa si due siit – namene Blick uf ihre Computer –, si mües- si mer liider säge, dass d Tökter wäge myne Bluetwärte beschlosse hiige, i müessi i Zuekunft Insulin spritze, d Tablette tüejes nät meh, han ig doch due glost. Ig ha sa unglüübig aaggugget u gsiit, das stimi sicher nät, mynner Wärte syge bis jitz gyng zfridestelend gsy. Due het si nug iis uf irer Underlaage gschouet u siit zu mym Glück: Eh, jitz hiigi si ds Zimmer verwägslet, sie hiigi igetlig nät zu mier wele. Si isch glihig umhi ggange, u mier hets gwohlet. Dry Wuchi sy ki lengi Zyt – u trotzdäm: Nan äs par Tagen ischt ma sig fascht äs bitzi wie dehiime vorchoe. Mi ischt umsorgt worde, het sig um nüt müe- sse kümmere, u wen iima öppis gfehlt het, su hescht jederzyt chöne Hülf aafordere. Vur alem van den eltere Pflegefachfrouwen ischt ma grad äs guets bitzi bemueteret worde; du bisch der mengischt vorchoe wie nes Chind, we d Mueter an dym Bett gstanden ischt. Mi het aber og di andere Patiente u Patientine lehre bchene, sigs bim Ässe, in der Therapie ol uf de gfüerte Spaziergäng. Mi isch zäme ids Gsprääch choe, het aber nät nume uber synner Lyde gchlagt. Mi het vernoh, wa si haarcheme u was si prueflig wärche. Vam iifache Puremandli bis zum Stadtheer: Äs sy hie van allne Schichte Mentsche zämechoe, u d Underschida sy chum z gspüre gsy. Di Wuchi sy wien im Schwick verby gsy. Di miischte Lüt hiin ä tüttligi Besserig erläbt u hii nan äs par Wuchi das Reha-Spital umhi dankbar chöne verlaa.