Äs git viu Lüt, wo gärn Krimere läse oder Krimere im Fernseh luege. Ou ig ha vo dr ­Agatha Christie ihri psychologisch sehr intressante Kriminaugschichte gläse. Das isch doch immer äs Gramsele, wiu äs ja unger angerem um ä Tod, um ä krimineue Mord geit. Das gruselet.

Doch i ha mau mit äre sibte Klass am Monte Amiata, zwüsche Floränz u Tarquinia, so nä Kriminaufau erläbt. Äbe nid nume uf äm Sofa, so gnüsslich deheim. I ha mit äre Klass, öppe füfzäh Giele u Modis, mit dr Klasselehrere u no zwene Begleiter/-inne, vo Floränz bis Tarquinia ä Wanderig gmacht. I bi für d Wanderroute zueständig gsi. I ha zwar äs Buech mit Wanderwäge gha, aber verloufe het me sich trotzdäm chönne. U erscht no am vulkanartige Chegel vom Monte Amiata, wo vollständig mit Waud überwachse isch gsi. 

I ha mi scho äm Namittag verirrt: Nach zwo Stung loufe, mit Rucksack u Durscht, zersch düruuf u de wider abe, han ig gmerkt, dass mer i de letschte zwo Stung öppe zäh Meter wytercho si. I bi dr Einzig gsi, wo das feschtgsteut het. Äs het scho afe ynachte, wo mer a ne Outostrass sy cho. Grad näbe ämene unbewohnte Huus. D Ching hei nümme wöue wyterloufe. U i ha gseit, auso, so schlafe mer grad hie. Mir hei immer dusse übernachtet, uf Isomätteli u im Schlafsack. Scho sy d Ching ygrichtet gsi. 

Mi hets aber nid lo sy, z wüsse, wo mer de eigetlech sy. I ha gmuetmasset, dass die Outostrass zdüruuf zumene Restorant füert. U we das würklech so isch, de weis i wider mit Sicherheit, wo mer sy. I ha de Erwachsnige verzeut vo mym Plan. I wöu go luege, ob paar hundert Meter wyter obe äs Restorant sygi. Das han i de ou gmacht. U suber, da isch würklech das Restorant gsi. 

U ig ha ddänkt, de trinken ig doch schnäu öppis. Äs isch nid lang ggange, de isch scho d Lehrere cho u het gseit: «D Ching sy so müed gsi, dass si sofort ygschlafe sy.» Nid lang später sy o ou no die angere Erwachsnige cho mit äm glyche Bscheid, dass d Ching aui töif schlafe. Ds Ganze isch mer gschmuech gsi. 

Mir heis trotzdäm luschtig gha, bis de dä Krimer ungereinisch i Fahrt isch cho. De chunt doch eis vo üsne Meitli, ä Italiänerin us Sizilie, wo aus Einzigi Italiänisch het chönne, vomene Carabinieri begleitet i ds Restorant. Was isch passiert? 

Die Ching, einisch i dä Schlafseck, si überhoupt nümme müed gsi. Si hei de dene ­wenige Outomobilischte, wo dört verby sy gfahre, mit de Stablatärne i ds Outo yche bbländet. Die Outofahrer widerum hei ddänkt, bi däm verlassnige Huus sygi Ybrächer, u hei d Polizei alarmiert. Die sy de cho. U d Ching hei plötzlich ä Patrulie Polizischte vor sech gha, wo mit Pischtole uf se ziut hei. Gschosse isch zwar nid worde. Doch d Ching sy natürlich gschockt gsi. U d Polizischte ou. Ersch rächt, wo si usegfunge hei, dass die Ching ohni Erwachsnigi dusse übernachte, was z Italie sowiso verbote isch. D Ching hei genau beobachtet u ghört, dass die Erwachsnige d Strass uuf i ne Beiz ggange sy. U so het üs de d Schmier mit dere hüülende Sizilianerin im Restorant gfunge. 

Mir sy schuudbewusst abe zu de Ching ggange. Die hei üs aui mit gröschte Vorwürf empfange u gseit, dass si fasch verschosse worde sygi. Das wärde si de scho de Eutere verzeue, wie die Erwachsnige se so elei hei la sy. Gott sei Dank het d Klasselehrere guet Italiänisch chönne u het d Carabinieri chönne beruehige. U die sy de abzottlet. U si hei feschtgsteut: Nid Ybrächer sy das gsi. Nume Ching us dr Schwyz. Wo d Schmier wägg isch gsi, han ig de Ching gseit, dass si jetz ä ächte Krimer erläbt heigi. U de nid nume im Fium. Ig heig das aues organisiert, damit si einisch so richtig ä Äggschen hei chönne mitmache. D Ching hei mir das natürlich nid gloubt. Zum Glück hets damaus no keini Händy ggä. Schüsch wäre d Eutere sofort informiert worde. 

Äs isch de no äs Zytli ggange, bis aui Ching u mir Erwachsnigi ygschlafe sy. I ha no lang däm nacheddänkt u natürlich üsi Fähler vou ygseh. Am Morge sy d Ching, nachdäm si d Haferflocke mit Miuch u Brot ggässe hei, scho chli miuder zu üs Erwachsnige gsi. U si hei afe verzeue, wie gfährlech das isch gsi, u hei das aues no gfährlicher verzeut. Äs isch de fasch Begeischterig entstande u si sy aui Heude gsi. U i dä nächschte Tage hätt keis me gseit, dass das Ärläbnis nid hätti söue passiere. Si sy stouz gsi, so öppis Gfährlechs überläbt z ha. U äbe nid uf äm Sofa, sondern i re Ächtwäut u Ächtzyt. I dr pädagogische Fachsprach heisst das: Ärläbnisungerricht. So hei mir üs Erwachsnigi ou no zu Heude gmacht.